Opisyal sa fisheries bureau niawhag sa mga local government unit (LGU) sa pagpalig-on sa mga paningkamot sa pagpatuman sa balaod aron masumpo ang grabeng illegal fishing techniques, sama sa dynamite fishing.

Matod ni Dr. Allan Poquita, direktor sa Bureau of Fisheries and Aquatic Resources (BFAR 7), kasagaran sa mga dynamite fishing operations mahitabo sa kadagatan sa munisipyo.

“That is their mandate to manage, to develop, and protect that area because that is their jurisdiction,” matod niya sa SunStar Cebu sa Miyerkules, Mayo 31, 2023.

Kini human nga ang insidente sa dynamite fishing sa dakbayan sa Lapu-Lapu nakakuha og atensyon sa social media human ang diver nga si Jeffrey Lim nipaambit niadtong Lunes, Mayo 29, og hulagway sa posibleng patay nga mga isda nga resulta sa ilegal nga pagpangisda.

Si Poquita niingon nga ang kadagatan sa municipal waters moabot og 15 kilometros gikan sa baybayon niini.

PAGBANTAY HIGPITAN

Si Lapu-Lapu City Mayor Junard “Ahong” Chan mopatawag og tigom tali sa mga opisyal sa mga coastal barangay ug Olango Island, uban sa Maritime Police, City Agriculture Fishery Office (CAFO), BFAR 7 ug ubang mga ahensya alang sa higpit nga pagbantay sa kadagatan sa siyudad.

Matod ni Chan nga ang pagpreserbar sa kadagatan ug malungtaron nga pagdumala sa marine resources importante kaayo alang sa turismo nga mahinungdanon sa ekonomiya.

“I strongly condemn the reprehensible practice of dynamite fishing and will take necessary measures to prosecute individuals involved in illegal fishing practices,” matod ni Chan. (KJF, REV)