NILAMBO na ang kahimtang sa panglawas ni Cebu City Mayor Edgardo Labella apan pabilin una siya sa pribadong tambalanan alang sa hingpit nga pagpaalim.

Kini ang paghulagway ni City Administrator Floro Casas Jr., human sa duha ka semana nga pagka-admit ni Labella sa ospital gumikan sa sepsis.

“Akong last tan-aw ni Mayor the other day, okay naman siya, I think he’s ready to go home na. But mao lagi na atong pagtan-aw, lahi sa tan-aw sa mga doctors ba,” paghulagway ni Casas.

“Si Mayor better na-gyud siya, compared sa last week,” dugang ni Casas.

Samtang wala pa makabalik si Labella, padayon una nga motimon sa Siyudad isip acting mayor si Bise Mayor Michael Rama.

Ang pamahayag ni Casas maoy naghatag og katin-awan may labot sa tsismis nga nagsugod pa sa niaging semana nga kritikal o namatay si Labella. (PAC)