CATBALOGAN CITY - Pipila ka punto ang giklaro ni Catbalogan City suspended mayor Stephany Uy - Tan bahin sa unom ka buwan nga suspension order nga giluwatan sa Ombudsman batok kaniya ug sa ubang opisyal sa dakbayan.

Matod ni Tan, daghan og nigawas sa social media nga mga istorya diin dunay nag ingon nga "nakab-ot na nila ang hustisya" ug " suspended ang giakusahan kay guilty".

Giklaro ni Tan nga ang kamandoan nga unom ka buwan nga suspension di magpasabot nga guilty na ang mga giakusahan.

Matod ni Tan, ang suspension order usa ka legal nga proseso sa Ombudsman alang sa pagahimuon nga imbestigasyon diin ang mga giakusahan suspensuhon una aron di maimpluwensyahan ang imbestigasyon.

Giklaro ni Tan nga mobalik ra gihapon sila human sa unom ka buwan nga suspension.

"Waray ko kamo talikdi, waray ko kamo baya-i. Nakarawat (Nadawat) na namon ang suspension order tikang (gikan) han Ombudsman" pasabot ni Tan sa tigpaluyo.

Lakip sa gisuspenso ang bise mayor niini nga si Sherwin Gabo ug pito ka konsehal ug pipila ka department heads.

Nilingkod karon isip Mayor sa dakbayan si Archie Fuentes.

Ang suspension order maoy resulta sa gipasakang kaso ni Bernard Jake Ramos, kawani sa Mayor's office, maylabot sa overpriced nga pagpalit og agricultural land.

Sa iyang bahin, si Mayor Fuentes nagkanayon nga sa unom ka buwan nga siya magdala sa kagamhanan, iyang gisiguro ang transparency sa mga transaksyon sa lokal nga kagamhanan ingon man sa mga barangay.

Gisaad ni Fuentes nga kunsultahon ang publiko sa bisan unsang polisiya nga ipatuman sa LGU.

Gisiguro usab ni Fuentes nga way mataktak nga kawani sa kagamhanan atol sa iyang paglingkod.

Duna hinuon bahad si Fuentes niadtong mga kawani nga matod pa dunay "laing amo" nga gisunod nga buot mo guba sa iyang pagdumala.

Matod ni Fuentes, di siya mag alangan sa paggamit sa tanang instrumento sa balaud para mapanubag ang dunay sala.