ANG Cebu City Legal Office (CCLO) mopahigayon og kaugalingon nga imbestigasyon may labot sa pagguba sa Universal Hotel Resorts Inc. (UHRI) sa duha ka edepisyo nga gipanag-iya sa Cebu City Government sa South Road Properties (SRP).

Si Atty. Rey Gealon, pangulo sa CCLO, nibutyag sa Superbalita Cebu nga gihatagan siya og direktiba ni Mayor Edgardo Labella pagsubay sa legalidad sa pagguba sa kanhi Senior Citizen ug Sugbo building didto sa SRP aron ila nang masugdan og tukod ang P18 bilyones nga Isla De La Victoria.

Si Gealon nagkanayon nga makig-alayon ang iyang buhatan ngadto sa Commission on Audit (COA) aron pagsuta kon gisunod ba sa tagdumala sa UHRI ang proseso pagguba sa mga edepisyo nga gipanag-iya sa gobyerno.

Ang City Attorney nga si Gealon nagkanayon nga adunay COA Circular No. 89-296 nga maoy tamdanan sa gobyerno o ni bisan kinsa sa higayon nga gub-on o bungkagon ang usa ka government property.

“We will coordinate with the Commission on Audit to find out if UHRI complied with Commission on Audit Circular No. 89-296 which prescribes the proper procedure..," matod ni Gealon. (PAC)