GISUGDAN na og hatag sa Cebu City Government ang financial assistance ngadto sa 80 ka mga barangay nga gitumong aron di kaayo masinati ang bati nga epekto sa coronavirus disease (Covid-19) sa mga kinabuhi sa mga lumolupyo.

Si Mayor Edgardo Labella nimando ngadto kang City Administrator Floro Casas Jr., sa pag-release sa maong pundo ngadto sa mga barangay kapitan aron aduna silay magamit para sa pagpalit og pagkaon, personal protective equipment ug uban pa.

Si Atty. Joan Marie Quiñanola, kinsa maoy gitahasan ni Labella sa pag-distribute, nagkanayon nga kapin o kulang 50 na ka barangay ang nakakuha sa ilang financial assistance.

Ang ilang nakuha nga tseke nagbalor og P1 milyon ngadto sa P3 milyones.

Kini nagsilbing hinabang ubos sa administrasyon ni Labella ngadto sa 1 ka milyon ka mga tawo sa siyudad nga nagpuyo sa 80 ka barangay sukad gipatuman ang enhanced community quarantine (ECQ).

Si Casas nagkanayon nga 80 porsiyento sa maong kantidad magamit sa kapitan para pagpalit og goods ug ang 20 porisyento para sa PPE.

Ang City Administrator nibutyag nga human gitunol ang tseke nga nakapangalan ngadto sa matag 80 barangay, ang barangay official na ang adunay katungod sa paggasto.

Iyang giawhag ang mga barangay opisyal sa paggamit sa maong kantidad subay sa gihimo nga guidelines.

Ang wa makakuha sa tseke kagahapon, Biyernes, Abril 3, 2020, mahimo nilang kuhaon ang ilang financial assistance sa Lunes, Abril 6. (PAC)