MOABOT sa 92 ka mga lawak ang gitanyag nga libre sa Cebu City Government aron puy-an an sa mga frontliner batok sa Coronavirus Disease (Covid-19).

Upat ka mga establishment ang nakigtambayayong sa buhatan ni Mayor Edgardo Labella aron magamit ang ilang mga room aron dili na mopauli sa ilang mga balay ang mga frontliner sama sa mga doktor, nurse ug uban pa.

Ang White Knight Hotel Cebu (15 rooms), Travel Bee (30 rooms), D' New Inn (32) rooms)ug Cebu Bradford Church (15 rooms) nipagit sa ilang mga lawak nga way bayad.

Ang maong mga lawak pulos air-conditioned aron komportable ang mga doctor ug nurse human sa ilang taas nga lahutay sa pagpangalagad sa ospital.

Si Atty. Jigo Dacua, pangulo sa Department of Public Services (DPS), kinsa maoy gitahasan ni City Administrator Floro Casas Jr., nagkanayon nga niboluntaryo ang mga tag-iya og establisemento nga magamit ang ilang pasilidad isip ilang ayuda sa siyudad niining krisis nga nasinati sa Pilipinas labi na sa Sugbo.

Si Dacua nagkanayon nga sagad sa mga okupante sa maong rooms ang mga kawani sa Cebu City Medical Center, Chong Hua Hospital ug Vicente Sotto Memorial Medical Center.

Ang mga frontliner sama sa doctor ug nurse nga layo ang ilang paulian, mahimong makigtambayayong sa buhatan sa Office of the Mayor pinaagi ni Casas o Dacua aron aduna silay kapahuwayan samtang hago sila sa trabaho. (PAC)