Ang Cebu City Government mogasto og P150 milyunes alang sa pagpalit og 100 ka electric vehicles (e-vehicles) aron madugang sa kasamtangang fleet sa green buses alang sa mas maayong serbisyo sa transportasyon.

Si Konsehal Joel Garganera, chairman sa committee on environment, nitug-an sa SunStar Cebu niadtong Huwebes, Enero 5, 2022, nga ang usa ka unit sa 30-seater e-vehicle nagkantidad og P4.5 milyunes.

Niabot na sa P450 milyones ang kinatibuk-ang gasto sa proyekto apan si Garganera niingon nga nakadawat og donasyon ang Kagamhanan sa Dakbayan gikan sa usa ka Sugbuanong negosyante ug nihimo sila og memorandum of agreement (MOA) sa supplier sa sakyanan nga nagtugot sa Siyudad nga makadaginot.

Ang negusyante nga si Iñaki Aboitiz midonar og P50 milyunes, ang Aboitiz Group nisaad og P100 milyunes, samtang ang e-vehicle provider nga Global Electric Transport maoy moabaga sa nahibiling P150 milyunes, matod ni Garganera.

Gibutyag usab sa konsehal nga ang Visayan Electric maoy moabaga sa gasto sa kuryente nga gamiton sa pag-charge sa mga sakyanan sulod sa duha ka tuig.

Sa gipadalang pamahayag sa SunStar Cebu, gikompirmar sa Visayan Electric nga suportado nila ang proyekto sa Kagamhanan sa Dakbayan sa pag-deploy og mga e-vehicle.

“The distribution company is still studying how to best minimize the cost of electricity for the buses and it assures its customers that the cost of Visayan Electric’s commitment will not be passed on to its customers,” mabasa ang tipik sa pamahayag sa Visayan Electric.

Gawas sa pagtabang sa kalikupan pinaagi sa dili pagbuga og polusyon, si Garganera niingon nga ang pag-angkon sa mga e-vehicle makapamenos usab sa gasto sa Siyudad sa gasolina ug pagmentinar sa tradisyonal nga mga bus.

Iyang gipasabot nga ang green buses sa City Hall adunay average nga kantidad sa gasolina nga P27 matag kilometro, samtang ang e-vehicle mobalor lang og P4.50 matag kilometro. (IRT)