MAGPABILIN nga isolation center ang Mandaue City Central School (MCCS) bisan ang Department of Education (DepEd) miabiso nga bakantehan na kini sa Hulyo 30, 2020.

Matod ni Atty. John Eddu Ibañez, ang executive secretary ni Mandaue City Mayor Jonas, nga bakantehan na sa siyudad ang siyam ka mga pampublikong tunghaan sa dakbayan nga gihimo og isolation center, gawas sa MCCS.

Upat nalang ang nagpabilin nga gihimong isolation centers tungod nag-anam-anam na sila og hawa sa ubang eskwelahan.

Dugang ni Ibañez nga nagkahisgotanay na sila sa DepEd division head sa ilang hangyo nga padayon gihapon ang paggamit sa Mandaue City Central School.

Sa text message ni Supt. Nimfa Bongo, DepEd Mandaue Division head, nga ila pa kining ipinalisa sa Miyerkules, Hulyo 22, sa virtual meeting niini sa Local School Board (LSB) sa dakabayan.

Dugang ni Bongo nga wala pay gihatag nga pormal nga hangyo ang lokal nga kagamhanan sa Mandaue mahitungod sa padayong paggamit sa MCCS.

Sa panahon nga mohatag og pormal nga hangyo ang dakbayan, ihatag dayon kini ni Bongo sa rehiyonal nga buhatan aron maproseso ang maong hangyo.

Tungod nagkasaka ang kaso sa Mandaue, ang Central impotante human makaakomodar og daghang pasyente.

Ang maong eskwelhana makaakomodar ngadto sa 1,700 ka mga pasyente.

Sa laing bahin, aduna na say gitan-aw nga himoong isolation center sa dakbayan, ang Norkis Park sa Plaridel ug ang Cebu North Bus Terminal (CBN) sa Barangay Subangdaku.

Nanguna sa maong proyekto ang Department of Public Works and Highways (DPWH) ug aduna na sab silay igong pundo aron paghimo sa maong mga isolation center.

Kung mahuman na kini, ang Norkis Park modawat og mga walay simtomas ngadto sa mild lang nga pasyente.

Sa CBNT, modawat og pasyente nga dunay mild ngadto sa moderate nga simtomas.

Adunay 100 ka mga pasyente sa MCCS ug 280 na sa kinatibuk-an ang na-admit sa maong pasilidad nga pulos nakarekober na sa sakit. (KFD)