Andam na ang Dakbayan sa Lapu-Lapu alang sa iyang pagpamakuna sa mga lumolupyo batok sa coronavirus disease (Covid-19) human sa malampusong pagpahigayon sa vaccination simulation sa Miyerkules sa buntag, Marso 3, 2021.

Ang simulation gipahigayon sa Barangay Pajo gym.

Matod ni Mayor Junard “Ahong”Chan nga nagpasabot nga ang Siyudad andam na alang sa phase 1 sa pagpamakuna nga alang sa mga frontline healthcare worker.

Iyang gipasigarbo ang Siyudad nga maoy labing unang nakapahigayon sa rehiyon 7.

Matod ni Chan nga ang CoronaVac sa Sinovac sa China maoy unang ihatag sa nasudnong kagamhanan.

Aron makita sa katawhan nga luwas ang bakuna sukwahi sa pagduda sa pipila, matod ni Chan nga siya ug si Dr. Mary Jean Loreche, tigpamaba ug chief pathologist sa sa Department of Health (DOH) 7, maoy unang magpabakuna.

“Ang Sinovac maoy unang ihatag nga bakuna gikan sa atong nasudnong kagamhanan ug matod ni Dr. Mary Jean Loreche sa DOH 7 nga luwas ug epektibo kini. Gani, inig abot sa mga supply sa atong dakbayan kaming duha ang unang magpabakuna,” matod ni Chan.

Alang sa phase 2 sa pagbakuna, gusto ni Chan nga isunod ang mga drayber sa pampublikong mga sakyanan ug mga manindahay.

Adto na sa phase 3 ang senior citizens, persons with disability (PWD) ug mga kabos. Ang katapusan mao ang kapulisan, kabomberohan ug Bureau of Jail Management and Penology (BJMP).

“Samtang nagpaabot ta sa supply sa bakuna, nanghangyo ko kaninyo nga mosunod lang ta sa health protocols. Kanunaya ang pagsul-ob sa face masks ug face shields, padayon ta sa pag-obserbar sa social distancing, batasana usab ang paghugas sa kamot ug paggamit sa alcohol o hand sanitizer,” awhag ni Chan sa mga Oponganon. (REV)