DILI na modawat og Personal Data Sheet (PDS) ang Human Resource Development Office (HRDO) sugod karong adlawa, Hulyo 9 sa mga aplikante nga gustong motrabaho sa Cebu City Government.

Kini ang gipadayag ni Cebu City Administrator Floro Casas Jr., human nilapas na sa gidaghanon ang mga PDS nga ilang nadawat itandi sa bakanteng trabaho. “Sa pagkakaron, nihunong nata sa pagpanawat og applications kay as of now we already have 1,600 applications for a vacancy nga naara sa 1,300 so ni-exceed na ta sa atong applicants,” padayag ni Casas.

Gikan sa pagdaog ni Mayor Edgardo Labella niadtong Mayo 13, paglabay sa pipila ka adlaw, nagpundok na ang mga tawo didto sa iyang kanhi buhatan sa Vice Mayor’s Office para mo-apply og trabaho.

Ang mayor sugaton pa sa mga tawo sa higayon nga makit-an siyang maglakaw sa lobby sa City Hall ug ang tanang concern sa mga tawo adto ipasa sa buhatan sa City Administrator.

Si Casas nagkanayon nga aduna nay mga tawo nga ilang napilian nga maoy mohulip sa 1,300 ka casual employees kansang kontra kutob ra niadtong Hunyo 30.

Gihulagway sa City Administrator nga gawas sa mga aplikante mga giindurso sa mga City Councilor, kapitan ug kagawad aduna pay mga walk-in applicants ang niadto sa City Hall apan wala na kini maatiman.

“Dili na nato sila ma-entertain kay moari sila unya dili na ma-process kay wala namay vacancy so magsayangsayang lang sila sa panahon moari diri so akong advice nila nga dili nalang sila moari sa City Hall,” matod sa alter ego sa mayor.

“Ako lang silang hangyuon kay sa pagkakaron wala naman tay bakante, wala na gyud mi mahimo kon moanhi pamo. Paabot lang mo kon aduna pa tay laing advisory para sa vacancy sa City Government,” ni Casas pa. (PAC)