GISAULOG sa Cokaliong Shipping Lines Inc. ang ilang ika traynta ka tuig o 30th founding anniversary pinaagi sa usa ka dakong party niadtong Dominggo, Disyembre 8.

Si Sen. Grace Poe ang usa sa mga dagkong pinasidunggang dinapit. Sa iyang inspirational message, iyang gihulagway ang Cokaliong Shipping nga usa ka “carrier of dreams.”

Kini tungod ang mga barko ni Chester Cokaliong maoy magdala sa mga estudyante ug mga trabahante gikan sa ilang mga probinsiya ngadto sa lugar kung asa sila mangeskewela o manrabaho.

Atol sa dakong party, nidonar ang Pilipinas Shell Foundation Inc. ug Pioneer Insurance & Surety Corporation ngadto sa Edgar Cokaliong Foundation Inc. Ang Shell Foundation nihatag og tseke nga P2 million samtang ang Pioneer nihatag og P1 million.

Dakong pasalamat ni Chester Cokaliong, founder ug chief executive officer ug chief operating officer sa Cokaliong Shipping Lines Inc., ngadto sa mga partners sa Cokaliong ug sa tanang mga tawo nga nakatampo sa pagpalambo sa kompaniya niya.

Atol pud sa party, gitagaan og pasidungog ang 8 most honored companies ug top 10 business partners.

Gilusad usab sa party ang 30th founding anniversary coffee table book nga adunay title “A Legacy of Dreams Realized 2009-2019.” Gipahigayon ang dakong party sa Radisson Blu sa Cebu City. (MPS)