Dobleng paningkamot ang gihimo karon sa Commission on Elections (Comelec) pagpasabot sa mga Sugboanon sa importansya ug katungod sa pagbotar sa umaabot piniliay sa Mayo 2022.

Kini maoy gibutyag ni Atty. Lionel Castillano, pangu sa Comelec- Cebu Province.

“The Comelec, nakita niya nga ubos pa gyud kaayo mi labi na usually naa mi five percent nga increase sa among registrants. In fact, mas daghan pa ang among natangtang because of failure to vote twice kaysa among narehistro,” matod ni Castillano sa mga tigbalita sa Marso 2.

Giangkon sa buhatan nga ang restrictions sa pandemya, kahadlok sa mga tawo sa pag gawas sa balay ug pag balhin sa mga botante pipila lang sa mga hinungdan sa ubos nga datos sa nakaparehistro.

“Naundang ta sa pandemic. Tapos we adjusted the registration sa new normal. So karon ang Comelec gi-taas na niya ang registration,” dugang ni Castillano.

Subay sa talaan sa buhatan, adunay 17, 263 ka mga application ang naproseso sa mga opisina gikan sa Pebrero 1 hangtod Pebrero 27 alang sa bag-ong mga botante. Samtang niadtong Septiyembre 2020, hangtod Enero 14, 2021, moabot lang usab sa kapin 51,000 ang nakaparehistro.

Nalakip na sa maong datos ang tulo ka dagkong mga syudad sama sa Sugbo, Mandaue ug Lapu-Lapu. Tungod niini, nangayo og tabang ang buhatan ni kanhi Comelec Commissioner Gregorio ‘Goyo’ Larrazabal alang sa gilaraw nga information drive. (ANV)