USA ka construction worker gidunggab patay alas 6:50 sa buntag sa Northwood Residences, Barangay Canduman, Mandaue City.

Si Angelo Añasco, 41, taga Brgy. Tabionan, San Fernando, Cebu, naabtan sa kapulisan sa Dakbayan sa Mandaue nga nagkulob ug naligo na sa kaugalingong dugo. Base sa imbestigasyon sa Mandue City Police Office Station 6, usa sa mga security guard sa Northwood Residences nga si Windel Ebarita, mireport sa kapulisan nga nakit-an si Añasco sa construction site nga patay na.

Pag-abot sa kapulisan sa crime scene nga gipangulohan ni Police Cpl. Ryan Diamada, nakita nila si Añasco nga nagkulob ug nagbanaw na ang iyang dugo sa dapit sa construction site.

Human miabot ang Scene of the Crime Operatives 7 (SOCO) ug nasuta nga naa ni dinunggaban sa walang dughan ug laing samad sa wala nga kilay hinungdan sa iyang kamatayon.

Sigon ni Police Sgt. Ronald Sabad, sa MCPO Station 6, wa pa silay klarong anggulo kon kinsa ang posibleng suspek sa krimen ug nagpadayon pa ang kapulisan sa pag-imbestigar sa kaso.

Sa pagkakaron, ang lawas ni Añasco gidala sa Rolling Hills Funeral Homes. (KFD)