GIPAHIBAWO ni Lapu-Lapu City Mayor Junard “Ahong” Chan nga inanay nga mikunhod na ang mga kaso sa coronavirus disease (Covid-19) sa dakbayan itandi sa milabay nga mga adlaw.

Sa pagkakaron anaa na lang sa 719 ka aktibong kaso ang dakbayan. Mas nikunhod kini itandi sa 740 nga aktibong kaso niadtong Pebrero 26.

Gani miabot pa kini ngadto sa 763 niadtong Pebrero 25.

Nikunhod usab ang bag-ong mga kaso niadtong Pebrero 27 nga dunay 22.

Dakong pagkunhod gikan sa 59 niadtong Pebrero 26, 128 niadtong Pebrero 25 ug 88 sa Pebrero 24.

Apan bisan pa niini, padayon ang pahimangno ni Chan sa mga Oponganon nga padayon ang disiplina sa kaugalingon ug motuman sa minimum health protocol sanglit taas gihapon ang naasoyng mga numero itandi niadtong hinapos sa miaging tuig.

Giawhag usab niya ang tanan sa pagtaho dayon sa mga awtoridad o ba kaha pagpahinumdom sa mga nagpabadlong nga wala motuman sa minimum health protocol.

Nagpabilin ang curfew sa dakbayan nga magsugod sa alas 10 sa gabie.

Wa hinuoy labot niini ang mga essential nga trabahante kun APOR (authorized persons outside residence).

Sa kinatubuk-an ang dakbayan nakatala og 4,131 ka kaso sukad sa Abril sa miaging tuig, diin 3,281 kun 79.4 porsyento ang nakarekober.

Moabot sa 131 ang namatay usab sa virus kun 3.2 porsiyento. (GCM)