Napuno sa mga samad pinaakan ang kalawasan sa usa ka babaye human gibugno sa usa ka iro nga nakagawas sa gate sa balay sa may Brgy. Looc, Lungsod sa Oslob, Cebu pasado alas 4 sa hapon sa Martes, Hunyo 8, 2021.

Si Jeny Rose Gomilao, 16, dalaga, taga Brgy. Looc, Oslob, padung na unta manginhas aron isuwa sa panihapon, apan wala makatiwas human gibugno sa iro nga Rottweiler.

Ang Rottweiler usa ka breed sa dako nga domestic dog.

Si Police Officer Elmer Ijan, desk officer sa Oslob Police Station nga nahinabi sa Superbalita Cebu, nibutyag nga ilang nadawat ang report gabii na sa Martes.

Matod ni Ijan nga si Gomilao, kuyog ang iyang duha ka mga pag-umangkon, padung na unta manginhas, apan sa kalit lang miabot ang dako nga iro nga niambak sa gate gikan sa balay diin sa atubangan sila nanginhas.

“Padung unta ni manginhas ang biktima unya kining iro nga wa sab hikti sa tagtungod, dali ra kaayo nakaambak sa luyo kay dako man gud ni unya mo ra ang gate or ang sea wall,” saysay ni Ijan.

Matod pa sa mga nakasaksi sa panghitabo nga giibalikbalikan sa pagbugno sa iro si Gomilao hinungdan nga nakaangkon siya og daghan nga mga pinaakan sa nagkadaiyang parte sa lawas.

Gisuwayan pa og pugong sa tag-iya ang iro apan mobalik gyud og bugno kang Gomilao.

Usa ka “Tata” Kintanar Copper nipakita sa ilang buhatan nga maoy tag-iya sa iro.

Si Gomilao daling gidala sa labing duol nga tambalanan sa Oslob aron patambalan.

Sa kasamtangan, si Gomilao anaa sa ilang balay, apan ang pamilya nagplano nga ipabalik kini sa hospital kay nagsige gihapon og dugo ang iyang mga samad.

Niining pagsulat, P3,000 pa lang ang nadawat sa pamilya ni Gomilao nga tabang gikan sa tag-iya sa iro, apan kuwang ra kaayo ni sa pagpatambal.

Reckless imprudence resulting in physical injuries ug kalapasan sa RA 9482 kun Anti-Rabies Act of 2007 ang mahimong ipasaka nga kaso batok sa tag-iya sa iro kon di makahatag og suporta sa pagpatambal kang Gomilao.