Tungod sa pagsaka sa mga kaso sa coronavirus disease 2019 (Covid-19) sa lungsod sa Dalaguete, gimandoan na ang tanan nga moduaw sa lungsod, ilabi na kon may ilubong, kinahanglan nga mopresentar og negatibo nga resulta sa Reverse Transcription Polymerase Chain Reaction (RT-PCR) o Covid-19 test.

Walay labot niini ang mga authorized persons outside residence (Apor) ug essential workers.

Dili na usab makasayonsayon og pauli ang locally stranded individuals (LSI) kon wala gyuy urgent o hinanali nga tambongan sa lungsod.

Kini tungod kinahanglan nga mag-agad sa availability sa quarantine facilities ug urgency sa sitwasyon ang pag release og Certificate of Acceptance sa barangay o ba kaha sa lungsod.

Tungod kay gimando ang pagpaubos sa 14 ka adlaw nga quarantine sa tanan nga LSI’s, hinuon mahimo nga mag -home quarantine apan kinahanglan nga makapasar kini subay sa standard sa DOH-7.

Sa pagpugong sa tapoktapok, gikanselar na usab ang uban nga mga kalihukan sa pista sa lungsod nga ipahigayon sa Pebrero 9-10, gawas lang sa relihiyosong kalihukan sa simbahan.

Gibalik usab ang tanan subay sa Executive Order No. 49 ni Gov. Gwendolyn Garcian nga naglatid sa limitasyon sa pagsulod-guwa sa mga tawo sa mga establisimento ug pagtapok-tapok.

Ang Dalaguete nakatala og moabot sa 19 ka mga aktibong kaso sa Covid-19 sa Enero 24, 16 niini ang gi-isolate samtang duha ang gi-admit sa ospital. Adunay 37 na nga naayo ug usa na ang namatay. (ANV)