Masaksihan og balik ang dancing inmates sa Cebu Provincial Detention and Rehabilitation Center (CPDRC) karong adlawa, Agusto 12, 2022, alas 8:00 sa buntag, subay sa re-launching sa grupo isip kabahin sa kasaulogan sa ika-453 nga kasumaran sa Probinsiya sa Sugbo.

Ang inmates gitudloan sa award-winning Cebuano dancesport choreographer nga si Ed Hayco.

“I would like to thank Ed Hayco for embracing this program and selflessly helping in coming up with new dance routines,” matod ni Cebu Governor Gwendolyn Garcia.

Unang nabantog ang dancing inmates human ni-viral ang video niini dihang nisayaw sila sa sikat nga kantang “Thriller” ni kanhi pop star Michael Jackson ug gi-upload sa Youtube.

Sukad sa 2007, dunay regular nga mga turista nga bisita sa provincial jail aron motan-aw sa dancing inmates.

Apan sa 2010, temporaryong gipahunong kini subay sa imbestigasyon sa kontrobersiya sa mga donasyon ug contributions nga gihatag.

Uwahing nakita ang dancing inmates sa Disyembre 2020 diin nipahigayon sa ‘Unity Dance’ nga sponsored sa National Commission for Culture and the Arts (NCCA). (ANV / Hulagway file photo sa SunStar)