Subay sa padayong pagdumili ug wala pag-ila sa Department of the Interior and Local Government (DILG) ug Inter Agency Task Force (IATF) sa balaod sa lalawigan sa Sugbo kalabot sa optional nga pagsul-ob og face mask sa mga lugar sa probinsya nga hawan ug well-ventilated, gisugyot ni Cebu Vice Governor Hilario Davide III nga adto na sila mokwestyon sa korte.

Sa iyang pag-atubang sa media sa Huwebes, Hunyo 16, si Davide nga usa ka abogado ug maoy nag chair atol sa pagpasar sa ordinansa sa Hunta Probinsyal sa Hunyo 14, nagtuo nga dunay basehanan ang pagpatuman sa Executive Order (EO) No. 16 tungod sa gipasar nga ordinansa pinasubay sa giya sa Local Government Code.

“Kon buot kwestiyunon na sa IATF, adto sila sa korte to question the validity of the ordinance. Pero ang coverage within the province,” matod ni Davide.

Pasabot sa bise gobernador nga ang maong lakang maghatag usab og kahigayonan sa mga lokal nga kagamhanan sa pag exercise sa katungod sa local autonomy.

“...ang akong position ana is its already an ordinance, it’s a law. So, I think that mao gyud na ang mo prevail. That’s my position and besides this is an exercise of the provinces of the provincial governments autonomy, local autonomy. Naa man gyud na sa Local Government Code,” matod ni Davide.

Bisan pa nga managlahi og partido sila sa gobernador sa miaging eleksiyon, nagtuo siya nga mahimong maghiusa ug magtinabangay kon alang lang sa kaayohan sa mga Sugboanon.

“Humana man ang politika, humana man ang election, niagi naman and I am always committed since from the very start since 2019 elections, I announced that I will be supporting the governor’s programs and projects provided nga kining makatabang sa Sugbo ug sa mga sugboanon. And kini nakita pod nako nga this is for Cebu. Nganong mo kuan man ta nga di man na nako mission sa kinabuhi nga mo object kanunay?,” matod ni Davide sa Hunyo 16, 2022.

Subay niini, nipadayag ug suportado sa League of Municipalities of the Philippines (LMP) Cebu chapter ug Philippine Councilors League (PCL) ang Executive Ordinance No.16 ug ordinansa sa probinsya sa Sugbo.

Kini subay sa giluwatang resolusyon sa Hunyo 16, 2022.

Unang mipahibaw sa resolusyon pag suporta sa kagamhanan sa probinsya sa Sugbo ang LMP Cebu Chapter pinangulohan ni Liloan Mayor Atty. Christina Garcia-Frasco nga naglingkod isip LMP Cebu President.

Sa maong resolusiyon, gisaysay sa LMP Cebu ang haum nga lakang alang sa pag-uswag sa new normal sa matag lokalidad sa probinsya sa Sugbo gumikan sa nasinating pandemya sa nasud.

Giuyonan usab niini ang lagda nga nagsaysay sa pagsul-ob gihapon sa face mask sa mga lugar nga sirado ug crowded ingon man ang pagsul-ob usab sa face mask sa mga tawo nga nakasinati og simtomas sa Covid-19 sama sa ubo, sip-on, subaw ug hilanat.

“...the League of Municipalities of the Philippines Cebu Chapter, upon a motion passed en masse, has given their full support to adopt Cebu Governor Gwendolyn Garcia’s Executive Order No. 16 within the respective territorial jurisdictions of the member-Mayors of LMP Cebu,” saysay sa resolusyon.