Giakusahan sa inahan sa 17 anyos nga lalakeng prime suspect sa pagpatay kang Christine Lee Silawan nga gimao-mao sa mga awtoridad ang mga ebidensya batok sa iyang anak.

Si Nina (di tinuod niyang ngan) nipasangil nga hayan dunay nag-apas ang mga awtoridad sa P2 milyunes nga reward sa makaila ug makatudlo sa mamumuno ni Silawan.

“Wa lang ni sakyi og award award, dili seguro ingon ana ka force, nga mo pick up na lang mo og inosente nga tawo,” matod ni Nina, nga klarong nagpasabot sa National Bureau of Investigation (NBI) 7.

Si Nina niingon nga ang giingon nga mga account sa iyang anak gigama-gama lang kay usa ra ang social media account sa iyang anak nga mao ang Cliff Malik.

Nagduda siya nga kunsabo sa mga awtoridad ang mga saksi nga iyang giingon nga wa makaila sa iyang anak.

Si Nina di makatuo nga nailhan ang iyang anak pinaagi sa close circuit television (CCTV) nga maoy gipresentar sa NBI nga apil sa ilang mga ebidensya.

“Unsaon pagklaro ana nga nagtalikod man na, wa man mag-atubang,” matod ni Nina sa sama nga interview.

Matod niya nga ang gitumbok nga chat mugna ra gihapon sa mga awtoridad kay “dali” ra kining himuon.

Iyang giangkon nga nisulti ang iyang anak nga nagkauyab sila ni Silawan sa unang adlaw sa klase, apan usa ra ka semana kay nagbuwag dayon sila.

Iyang gihulagway ang iyang anak nga “babaero” kay daghan og uyab.

Wa molakaw

Matod niya nga sa Dominggo, Marso 10, ang iyang anak nitabang sa pag-ayo sa ilang atop sa buntag.

Nianang pagkahapon, niduwa kini og basketball ug mga alas 6 sa gabii, niuli kini sa ilang balay aron mokaon ug nitan-aw og TV ug nanihapon.

Pagkahuman niini, natulog ang iyang anak.

Kon ang iyang anak pa maoy nagpatay, matod ni Nina nga nianang pagka Lunes (Marso 11) sa buntag, nieskwela kini nga di unta mahimo kay “tulala” (shock) pa unta kini.

Ang lawas ni Silawan nianang buntaga sa bakanteng luna sa Sityo Mahayahay, Barangay Pajac.

“Hayahay ang nagpatay ana kay ang akong anak prime suspect,” dugang ni Nina.

Gi-pick up

Matod ni Nina nga di kini unang higayon nga gi-pick ang iyang anak sa mga awtoridad.

Niadtong Marso 12 samtang nagduwa sa ilang dapit og basketball ang iyang anak, gi pick kini sa mga pulis.

Wa siya mahibawo kon diin dad-a, apan dihang nahiuli iyang anak, nitug-an kini nga gidala siya sa mga pulis.

Nianang Marso 13, ang mga NBI agent na usab ang nibisita kanila ug nisukitsukit sa iyang anak.

Matod ni Nina nga sa pagkaila niya sa iyang anak, di siya makatuo nga makabuhat kini sa mao nga luog nga krimen.

“Di kabuhat ang akong anak sa linuog nga paagi,” matod ni Nina sa Superbalita Cebu.

Ang iyang anak naa na karon sa kustodiya sa Department of Social Welfare and Development (DSWD).

Ila kining gikakita mga alas 6 sa gabii sa Lunes, sukad kini gidala sa mga NBI agent niadtong Sabado sa gabii. (Alan Tangcawan)