KON nagplano ka nga magkaraoke, disco ug ubang matang sa pagsabasaba panahon sa kagabhion atol sa Semana Santa sa dakbayan sa Sugbo, ayaw nalang kana ipadayon.

Kay si Mayor Tomas Osmeña hingpit nga nidili sa mao nga matang nga paglingawlingaw ning Semana Santa pinaagi sa iyang paglagda og executive order kagahapon.

Gitahasan ni Osmeña sa pagsanta sa maong kalihukan kon aduna man mao ang mga pulis ubos sa liderato ni Senior Supt. Joel Doria sa Cebu City Police Office (CCPO) kinsa maoy mobadlong o mopahamtang og silot sa mga makalapas.

Ang mayor nibutyag nga mahimo hinuon nga maka-videoke, disco ug ubang matang sa lingawlingaw sa adlaw, apan kinahanglan nga hunongon sa oras tingkataulog aron di matugaw ang mga silingan.

Dugang ni Osmeña nga mamahimo usab nga makalingawlingaw ang mga Sugbuanon pinaagi sa pag-inom-inom sa ilang mga balay sanglit dili sama sa Sinulog, wala siyay executive order para sa liquor ban.