ORMOC City - Nasikop sa mga sakop sa Philippine Drug Enforcement Agency (PDEA) 8 ang walo ka drug personalities sa gihimo nga anti- illegal drugs operation sa Tacloban City.

Ang operasyon gilusad alas 7:45 sa gabii niadtong Martes, Hunyo 15, 2021 sa Barangay 105, Suhi, Tacloban City.

Napuhag usab sa PDEA 8 ang usa ka drug den sa maong lugar.

Ang mga nadakpan mao sila si Allan Vinas, tag-iya sa drug den; Romnick Juble; Edwin Ocenar; John Leand Lopido; Bryan Dela Cruz; Eric Yepes; Cris Ian Montejo ug Raymund Macawille pulos mga bisita sa drug den.

Nasakmit sa mga operatiba ang 15 gramos nga gituohang shabu nga dunay kantidad nga P102,000.

Matod sa PDEA, mihimo usab sila og buy-bust sa wala pa gipuhag ang drug den diin naabtan ang mga bisita nga naggamit og shabu.

Dugang pa sa PDEA, taudtaod na nila gipanid-an ang illegal nga kalihukan sa lugar human sila nakadawat og report bahin niini.

Gipaubos kini nila sa pagpaniid ug ilang nakompirma ang maong kalihukan hinungdan nga ilang gilusad ang operasyon kauban sa kapulisan.

Naa na karon sa kustodiya sa PDEA ang mga dinakpan ug gipasakaan na og kasong kalapasan sa Republic Act 9165. / (JKDP)