Dugang tulo ka vaccination sites ang giablihan sa Sugbo niadtong Mayo 11, 2021 aron pagpadali sa pagpamakuna sa mga kawani sa pribadong sektor ubos sa Project Balik Buhay (PBB) Covid-19 vaccination.

Si Dr. Mary Jean Loreche, tigpamaba sa Department of Health (DOH) 7, nagkanayon nga dugang inoculation sites nahimutang sa Mactan Doctors’ Hospital sa Dakbayan sa Lapu-Lapu, Visayas Community Medical Center sa Dakbayan sa Sugbo, ug Mendero Medical Center sa Lungsod sa Consolacion.

Sa pagkakaron, ang Sugbo duna nay unom ka inoculation sites alang sa nagpadayong pagpamakuna sa senior citizens, healthcare workers, ug indibiduwal nga dunay comorbidities o ubang sakit nga gihambin nga nagtrabaho sa Department of Health (DOH)-registered ug local government approved-private companies.

Unang tulo ka vaccinations sites mao ang Cebu Doctors’ University Hospital sa Dakbayan sa Sugbo, Chong Hua Hospital sa Dakbayan sa Mandaue ug Allegiant Regional Care Hospital sa Lapu-Lapu City. (WBS)