NAKADAWAT og impormasyon karon ang Philippine Drug Enforcement Agency (PDEA)-7 nga dunay pipila ka mga disc jockey (DJ) sa high-end bars nga sekretong namaligya og party drugs ngadto na sa ilang kaila nga mga kustomer nga mogimik sa bars.

Kini ang gibutyag ni PDEA-7 Regional Director Levi Ortiz sa Superbalita Cebu sa pakighinabi kaniya.

Matod ni Ortiz, duna silay nadawat nga reports nga gipadangat sa ilang buhatan niining pipila ka DJs nga namaligya og party drugs apan dili una niini mabutyag kon pila ka mga tawo.

Kini sanglit nagpadayon pa ang ilang pag-monitor kon kinsa kining mga tawhana nga misulod usab sa ilegal nga kalihukan ug nagpahimus sa panahon dinha sa ila unyang trabaho.

“Actually dugay nani nga problemaha. Apan karon duna na gyud nisumbong kanato. Duna tay mga pangalan apan ato pa gyud ni nga palawman ang pag-monitor niini.”

Hinuon, gitin-aw ni Ortiz nga sa kasamtangan wala pa mangabli ang mga bar tungod kay wala pay gitugotan sa kagamhanan.

Apan sa kaniadto nga sitwasyon samtang duna pay mga kalingawan, dunay high end bars o imnanan nga matod pa ang ilang DJs maoy namaligya og party drugs nga mao unya ang tutokan sa pagbalik na unya sa mga kalingawan.

“Mag-conduct ta og monitoring surveillance kadtong mga bars sa una nga namaligya og party drugs. Sa karon, kon mobalik man,” dugang ni Ortiz.

Gipahibawo usab ni Ortiz nga abli kanunay ang iyang buhatan ngadto na sa mga tawo nga andam mosumbong ngadto kanila kon sa panahon man gani nga mobalik na ang pag-abli niining bars ug kon nagpadayon ba gihapon ang ilang ilegal nga kalihukan o sila ba kaha mismo ang gitanyagan og party drugs niining nahisgutan nga mga tawo. Mamahimo sila nga makasumbong sa iyang opisina ug gisiguro nga pabiling tago ang ilang pangalan ug dili mahibaloan nga sila nagreklamo.

“Katong naay mga amigo nga hilig og party party unya nanginvite sa ilaha, ug matingala lang sila nga dali ra sila nga malipong panahon sa pag-inom dihang gidunolan sila, pwede ra gyud nga mosumbong sa among opisina.”

Gipasabot ni Ortiz kon unsa ka delikado ug ka kuyaw sa usa ka umiinom kining ipangsagol nga party drugs sa ilimnon kay mahimong matod pa makapakusog sa libido samtang ang mga tawo nga dili makakaya niining mga matang sa drugas, posibleng kamatayon pa ang ilang paingnan. (BBT)