GIKLARO sa usa ka grupo sa mga langyaw nga anaa sa Fuente Osmeña Circle sa dakbayan sa Sugbo nga nagpaabot lang sila sa sakyanan nga muhatod nila padung sa Mactan-Cebu International Airport.

Kini human gi-verify sa Superbalita Cebu Dominggo sa hapon, Pebrero 2, ang post nga ni-trend sa social media nga nagpakita sa mga foreign nationals nga nanghigda ug nanglikod sa Fuente Osmeña Circle dala ang ilang mga bagahe.

"Ingon ani mo treat ang mga Cebuano sa mga Chinese," asoy sa post sa usa ka netizen.

Pasado alas 4:16 sa hapon, Dominggo, ang maong post aduna nay kapin sa 1,800 ka reactions ug 4,500 ka shares sa Facebook.

Matod sa mga langyaw nga dili tinuod ang mga taho nga wala sila pasudla sa hotel, gane gikan sila ni-checkout sa usa ka hotel duol sa Fuente Osmeña Circle.

Wala na mutubag ang mga langyaw dihang gipangutana sa Superbalita Cebu ang ilang mga panganlan ug nationality ug gitataw nga ilaha kining "privacy."

Ang grupo naglangkob sa siyam ka mga langyaw diin lima niini lalaki ug upat ang babaye.

Giawhag ni Cebu City Tourism Commission head Jocelyn Pesquera ang mga Sugboanon nga likayan ang pag-post sa social media og mga pamahayag batok sa mga Chinese nationals.

Matod ni Pesquera nga dako og kontribusyon ang mga Chinese sa ekonomiya sa Sugbo.

"We should give them respect because in the same manner, if it will happen to us, we don't want the same thing nga himuon ta'g subject of ridicule," asoy ni Pesquera. (JCT/NDT/KAL/With Mae Fhel Gom-os, USJ-R Intern)