GATUSAN ka mga bata sa Barangay Tangke, Dakbayan sa Talisay ang nakabenipisyo sa bag-ong programa nga gilusad sa Talisay City Police Station (TCPS) nga mao ang "Police and Partner's Act of Kindness for Children in Talisay."

Ang maong programa himuon matag adlaw'ng Sabado sa Women and Children Protection Desk sa TCPS uban ang mga pribadong kompaniya nga mopahigayon og feeding program ngadto sa mga bata, kansang mga ginikanan nadakpan o nipaubos sa rehabilitasyon tungod sa pagkalambigit sa ilegal nga drugas.

Gihimo Miyerkules sa buntag, Nobyembre 13, 2019, ang pagpinirmahay sa Memorandum of Understanding tali sa sa TCPS ug sa mga pribadong kompaniya.

Gipasabot ni Talisay City Police Chief Gerard Ace Pelare nga usa kini ka paagi pag-combat sa ilegal nga drugas.

Gawas sa kanunay nga gihimo nga mga anti-drug operation sa mga pulis, matud ni Pelare nakita nila nga angay nga hatagan usab og pagtagad ang mga bata nga dakong naapektuhan.

Ipaubos usab ang mga bata og mga lecture kalabot sa ilang maayong panlawas, maayo nga binuhatan, ug nga pamaagi nga malikay sa ilegal nga drugas aron mas maagni sila alang sa maayong ugma.

Aduna usab himuon nga monitoring ug assessment sa paglambo sa maong mga bata. (FMD)