RESULTA sa political will sa usa ka lider sa nasod hinungdan nganong nalakip ang Pilipinas nga labing luwas nga puy-an sa tibuok kalibutan, base sa listahan sa Gallup Global Law and Order 2020 Index.

Mao kini ang gibutyag ni Police Brigadier General Albert Ignatius Ferro, direktor sa Police Regional Office (PRO) 7 kon ang usa ka lider hugot mopatuman sa balaud ug mosunod gyud ang mga tawo.

Ang Pilipinas nikuha og 84 nga puntos ug naa sa ika-37 nga dapit sa 144 ka mga nasod nga luwas puy-an, patas sa Australia, New Zealand, Poland ug Serbia.

Si Pres. Rodrigo Duterte giila nga ‘strong man’ tungod sa iyang mga polisiya sama sa gubat batok ilegal nga drugas ug kriminalidad diin ang mga tinugyanan sa balaod makita kanunay sa kadalanan.

Dugang ni Ferro nga atol sa pamunoan ni Duterte, upat ka tuig na ang nakalabay, gisunod niini ang pamaagi nga gihimo niya sa dakbayan sa Davao diin disiplinado.

Matod ni Ferro, kinahanglan nga ang mohulip sa katungdanan susama og kalidad ug pamaagi sa panggobyerno ni Duterte. Samtang, ang nag-una sa maong listahan mao ang nasod sa Singapore. (AYB)