AKONG mama daan na nga may sakit sa kidney. Sa wala pa ang Covid-19 wala jud nakadisisyon akong mama nga magpadialysis siya.

November last year diha mi nakahibalo nga gamay na lang ang parte sa iyang kidney nga maayo pa. Nag dagan ang mga buwan, nagkahinay sad akong mama.

Pila ka buwan nga nisulod ang Covid-19 sa Pilipinas, nakadesisyon na gyud mi nga ipa-dialysis na gyud si Mama sa mosugot siya o dili.

May 30, 2020, na-admit si Mama sa Vicente Sotto Memorial Medical Center ug sa pagswab nahibaw-an nga positive daw sya sa Covid.

Grabe ang kaguol sa among pamilya sagol kahadlok kay sa kadaghang tawo sa kalibutan kami pa gyud ang na Covid.

Namatay si Mama sa sotto nga wala mi nakakita o nakaestorya sa iya bisan man lang sa telepono.

Wala mi magdahum nga mao to ang dangatan ni Mama ug ingon ana ang sitwasyon sa iyang pagkamatay. Gipacremate ug ni uli nga abo na lang si Mama.

After sa pagka Covid ni Mama gipa swab ang tanang direct contact niya. Lima ka bata apil akong 2 years old nga baby ug ako ang nag positive pero asymptomatic.

Gidala mi sa Lahug Elementary School nga maoy gigamit nga Barangay Isolation Center (BIC) para sa mga nagpositibo sa Covid.

Pero wala namo damha nga mas kuyaw pa diay sa Covid among masinati sa eskwelahan kay sa simtomas sa virus.

Nawagtang ang akong hunahuna nga namatay si Mama sa dihang adunay laing mga kalihukan nga among nabantayan sulod sa eskwelahan.

Yes, grabe gyud among kaagi. Sa sulod sa 14 days nga isolation nakadungog nga naay nagdangoyngoy nga babaye sulod sa among kwarto.

Mura ang hilak gikan sa sulod sa CR diin madunggan sad nako ang paglagubo sa mga galon.

Bisan unsaon nako og ampo maputol gyud, mamatay gyud kos kahadlok ug dili sa Covid. Ug kon wala pako kagawas human sa 21 ka adlaw, basin nabuang na ko.

Ang akong manghud nga makamata kada alas tres sa ka adlawon makadungog nga naay nagkanta sa iyang tupad.

Ang among mga higdaanan among gisikitsikit kay usa raman mi kapamilyahan ug aron wala pud matagak sa mga bata. Apan unsa mang hitabo-a nga giuyog man ang among katre, gibira ang habol sa akong igsuon.

Grabe jud ang among kaagi nga na Covid among pamilya. Basta makabuang ang isolation sa skwelahan, taw-an gyud kaayo. Grabe, dili na ko ganahan mo balik if ever.

Mas uyon pako nga home isolation sa mga asymptomatic. Maka traumatize gyud. Labina kay puros under age ako kuyog, mahadlok ko masudlan og spirito same sa mga nasudlan sa una sa Lahug Elementary School. Dili najud ko mo balik didto if ever.

Ug wala pako nakagawas, nabuang nako kay wala koy tarong tulog kay sige na lang ka paminaw sa mga kasikas.

Yes, it’s real, my Mom died last June but our experience at the BIC is scarier than Covid. (Asoy kini sa babaye nga usa sa mga nasakit og Covid, apan ang ngan gipugngan ning mantalaan)