Usa ka oras ang paglanat sa pagluwas sa usa ka 40 anyos nga electrician sa mga sakop sa rescue team sa Bureau of Fire Protection (BFP) sa Dakbayan sa Sugbo gikan sa atop sa usa ka balay sa dan C. Padilla, Barangay Mambaling, Siyudad sa Sugbo sa pasado alas 11 sa buntag sa Biyernes, Hunyo 12, 2020.

Si SFO1 Romeo Birao sa Cebu City Fire Station nga nahinabi sa Superbalita Cebu niila sa biktima nga si Sherwin Yanong, 4O.

Matod ni Birao nga ang alarma ilang gitubag tungod sa maglisod pagpakanaug ang mga tawo sa dapit kang Yanong.

Dugang ni Birao nga nadawat nila ang pagpangayo og tabang alas 11:04 sa buntag.

Si Yanong didto sa atop sa duha ka andanang balay ni Jay Ibo. Si Ibo, silingan, nagpawiring sa kuryente sa ikaduhang andana sa iyang balay.

Si Ibo nga nga nahinabi sa Superbalita Cebu, nakugang human nakadungog sa pagpangayo og pakitabang ni Yanong kay giatake sa kasingkasing.

Nilanat og mga usa ka oras una pa nila makanaug gikan sa atop si Yanong. Gidala si Yanong sa Cebu City Medical Center (CCMC). / BBT