DUGAY na sa drug watch list ang habal-habal driver kinsa gipusil-patay niadtong Disyembre 18 sa gabii sa dan Dungo-an, Brgy. Basak, dakbayan sa Mandaue, matod sa pulis.

Gani giingon nga kapila ka higayon unta kini ipaubos sa tokhang, apan gihulagway si Freddy Canoy, 47, nga idlas.

Matod ni Police Senior Supt. Julian Entoma, pangulo sa Mandaue City Police Office (MCPO), nga sa wa pa ang Duterte administration, ang ngan ni Canoy anaa na sa listahan sa mga durugista sa Mandaue City, sakop sa Almadin drug group.

Dako ang pagduda ni Entoma nga ang nipatay ni Canoy, kauban ra niya sa grupo o kontra sa ilang grupo.

Dugang ni Entoma nga nakita nila nga ang mga pagpatay sa dakbayan sa Mandaue nga naglambigit sa mga suspek nga nakamotorsiklo tungod sa ginadiling drugas, hinungdan nga matod niya, mga salin-salin nalang kining ilang mga nasikop.

Ang nipusil-patay kang Canoy luwan og motorsiklo, kansang back rider nipusil kaniya sa makadaghang mga higayon.

Nanghimakak

Apan gihimakak sa pamilya ni Canoy, kinsa nibutyag nga usa lang ka yano nga panday ang biktima.

Gisusi pa sa kapulisan ang dapit kon duna bay mga CCTV camera nga anaa sa crime scene aron kon nakuha ang hitabo, mailhan ang mga a mamumuno.

“Kunbaga, (nag-unayay) na ni sila sa grupo, bale sa among mga nadakpan ani, mga salin na lang ni, kay dugay nani gi-target, but idlas lang ni, magsige og balhin-balhin thru habal-habal. Kagabii na-timingan gyud siguro ni siya sa iyang kontra,” gitug-an ni Entoma sa Superbalita Cebu.