Si Gobernador Gwendolyn Garcia nagplano sa pagpaluag pa sa pagsul-ob og face masks pinaagi sa paghimo niining optional bisan sa sirado nga mga dapit.

Sa taho sa ABS-CBN, si Garcia niingon nga gusto siyang sundon ang guidelines sa Singapore nga naghimong optional sa pagsul-ob sa face masks bisan sa indoor nga mga dapit sugod sa Agusto 29.

Sa pagkakaron, ang Lalawigan sa Sugbo nagtugot lang sa optional nga pagsul-ob og face masks sa gawas ug hawan nga mga dapit.

Niluwat og executive order si Garcia ug gipalig-on pa pinaagi sa usa ka ordinansa nga gipalabang sa Provincial Board.

Ang lakang gisaway ni kanhi Dept. of the Interior and Local Government (DILG) Secretary Eduardo Año ug sa Dept. of Health (DOH).

“I do plan to take consideration even indoors. We are now closely studying this. We are consulting other sectors including the local Department of Health, Department of Tourism, DTI, all other sectors because the wheels of government are not centered on the DOH alone,” kutlo kang Garcia sa ABS-CBN.

Nipasabot si Garcia nga tungod sa dugay na kaayong paghigpit nga mga polisiya sa kagamhanan, naapektuhan og maayo ang mga panginabuhi sa katawhan.

Ang gobernador nipasabot nga ang local government unit (LGU) dunay gahom ubos sa Local Government Code sa pagpatuman og mga lagda nga makaayo sa iyang mga konstituente.

Gawas pa, ang mga LGU mas nasayod kon unsay kahimtang o sitwasyon sa ilang tagsa-tagsa ka jurisdiction, busa mas nasayod kon unsa nga mga polisiya ang makaayo.

Matod ni Garcia nga ang iyang executive order gihan-ay pa sa iyang buhatan.

Di lang ang Lalawigan ang naghimong optional sa pagsul-ob og face masks, bisan ang Siyudad Sugbo, pinaagi sa Excutive Order No. 5 ni Mayor Michael Rama nga giluwatan niadtong Agusto 31, 2022, nga naghimo sa pagsul-ob sa face masks nga di obligatory sa gawas o mga lugar nga hawan.

Bisan ang pribadong mga establisemento ug mga tunghaang publiko ug pribado, ang mga nagdumala gihatagan og gahum sa pagdeterminar kon himuon bang compulsory ang pagsampong sa nawong sa manulod. Ang DOH ug DILG pulos namahayag nga wa usab sila konsultaha sa Cebu City.

Si DILG Secretary Benjamin Abalos nisaad hinuon nga iyang iduso ang lakang ni Rama ngadto sa Inter-Agency Task Force (IATF) aron himuong pilot area ang Cebu City sa mao nga polisiya.