MAGPADALA og representante si Gobernador Gwendolyn Garcia aron motambong sa pulong sa Malacañang kalabot sa updates sa African swine fever (ASF) sa kaulohan.

Ang representante maoy mopasabot sa baruganan ni Garcia kalabot sa ASF ban.

Kini human sa nadawat niya nga mensahe gikan sa provincial director sa Department of Agriculture (DA) pagpatawag sa tanan nga local chief executives o ang representante niini human pipila pa sa mga LGU ang wala motuman sa mando nga paglibkas sa ASF ban.

Atol sa pakighinabi sa mga tigbalita kang Garcia, gikwestyon niya ang inconsistency sa DA human kini mimando paglibkas sa ban ug pagpasulod na sa mga produkto sama sa de lata nga gikan sa mga apektado nga lugar sa ASF.

Hugot ang desisyon ni Garcia nga bisan pa man sa pagpatawag kaniya ug sa iyang mga kauban, magpabilin ang iyang desisyon pag-ban sa mga produkto sa baboy, feeds ug uban pa nga mi-commingle sa mga produkto gikan sa mga apektado nga lugar sama sa Luzon, Mindanao ug Region 8.

Matod ni Garcia, bisan pa man og ASF-free ang lalawigan, na-pressure siya sa padayon nga pagmando sa mga ahensya kaniya paglibkas na sa ban.

“Primarily it started with DA and for the time being other cabinet secretaries also called for a lifting of the ban. I believe that this is coming from the big food manufacturers that have their manufacturing plants in Luzon,” matod ni Garcia sa mga tigbalita gahapon Pebrero 24, 2020.

Gikwestyon ni Garcia ang desisyon sa DA kalabot sa pagpanalipod sa lalawigan sa ASF sanglit nag usab-usab man ang kamandoan niini.

Sa Pebrero 20, 2020, bag-o nga Executive Order (EO) No. 8 ang giluwatan ni Garcia.

Gidid-an niini nga makasulod ang feeds sa mga baboy, breeder pigs, semen materials ug uban pa nga produkto sa baboy gikan sa Luzon, Mindanao, Rehiyon 8 o Eastern Visayas ingon man ang gikan sa laing nasod nga nataptan sa ASF ug paingon sa lalawigan sa Sugbo. (ANV)