Molarga si Governor Gwendolyn Garcia uban ang pipila ka board members ngadto sa Negros Oriental karong adlawa, Marso 10, 2023, aron pagduaw sa haya ni anhing Governor Roel Degamo.

Si Garcia niingon nga gusto niyang mohatag sa iyang uwahing pagyukbo kang Degamo nga suod usab niyang higala isip gobernador, kinsa nga namatay human sa pag-ataki sa Marso 4, 2023, nga nikalas usab sa iyang mga tawo ug niangol sa pipila ka mga konstituwente.

Matod ni Garcia nga sukad siya nilingkod isip gobernador, suportado ni Degamo ang iyang mga lakang ug proyekto alang sa lalawigan sa Sugbo labina panahon sa pandemiya sa Covid-19.

Nagtuo si Garcia nga buhi ang demokrasya ug hustisya sa nasud ilabi na nga pipila sa mga suspek nasikop sa kapulisan ug mataral sa hukmanan.

Lakip sa panawagan ni Garcia nga masikop ang utok sa krimen nga nagplano sa linuog nga pagpatay sa iyang higalang gobernador.