HUMAN sa landslide niadtong Huwebes sa sayong buntag, mga danguyngoy sa usa ka babaye ug usa ka lalake nga nangayo og pakitabang ang nadungog sa pipila ka mga molupyo sa Sitio Tagaytay II, Barangay Tina-an, siyudad sa Naga sa dapit diin gituohang dunay mga tawo nga natabunan sa yuta.

Giasoy ni Apolonio Getutua, 60, presidente sa purok sa Sitio Tagaytay, nga duha ka gabii na niya nabatian ang tingog sa usa ka babaye nga naghilak matag pasado alas 12 sa tungang gabii sugod niadtong Huwebes ug ang pag-uwang sa mga iro.

“Para nako, murag multo gyud kay sa una wa ko makahunahuna nga naa diay babaye diha naapil kay pulos baya mga lalake diha ang missing,” sumala ni Apolonio.

Ang iyang gidudahan ang babaye nga iyang nabatian nagdanguyngoy kay ang hinigugma sa usa sa mga lumolupyo usab nga na-missing usab.

Siya nagtuo nga naghilak ang babaye kay nanginahanglan og pag-ampo ug magpakuha sa iyang lawas.

“Magpaampo siya o magpakuha ba sa iyang lawas,” dugang ni Apolonio.

Si Mila Arado, 51, molupyo usab sa samang dapit, nisaysay nga nakakita usab siya og dakong kayo sa nabungkag nga yuta ug nag-aso.

“Wa ko kahibawo if santilmo o unsa to siya basta nanlimbawot akong balahibo,” sigon ni Arado.

Susama usab og nabatian si Danilo Padilla nga hilak sa usa ka babaye ug tingog sa usa ka lalake nga nangayo og tabang alas 12 sa tungang gabii.

Matod ni Joe Getutua, 45, laing residente, nga hilak usab sa babaye nga nagbakho ug lalake nga nagpakitabang ang iya usab nadunggan.

Kagahapon, si Cebu Arcbishop Jose Palma niduaw sa mga biktima ug niresponso sa mga haya.

Sa opisyal nga talaan sa Department of Social Welfare and Development, niabot na og 35 ang naugkat nga patayng lawas, 15 ang naangol, ug 44 ang padayon nga gipangita.

Niabot usab og 1,059 ka pamilya ang gipahiluna sa evacuation center kun 4,331 ka individuals.