LIBUAN ka mga deboto ni Senyor San Jose ang ningdugok sa pontifical mass pahinungod sa kapistahan diha sa National Shrine of St. Joseph sa Dakbayan sa Mandaue.

Ang pontifical mass nga gipanguluhan ni Papal Nuncio Emeritus to South Korea ug Mongolia Bishop Osvaldo Padilla gihimo sa Miyerkules sa alas 10 sa buntag, Mayo 8.

Iyang gipahinumduman ang mga deboto nga bisan sa ka-simple sa kinabuhi ni San Jose, isip karpentero, nahimo siya nga usa sa mga instrumento alang sa kahiusahan sa sagrada pamilya. Siya nibarog alang sa pamilya.

Dugang niya nga susama unta kang San Jose, mahimo siya nga panig-ingnan, nga bisan sa unsa ka simple nga mga pamaagi, makatabang kita alang sa kahiusahan sa komunidad, magtabangay alang sa kalambuan.

Atol sa pontifical mass, nag-abot ang mga magkaatbang nga magpapili pagka-mayor ug bise mayor sa Dakbayan sa Mandaue, ug pipila sa ilang mga konsehales, pinanguluhan sa parehong magpapili pagkamayor, re-electionist, Mayor Luigi Quisumbing ug sixto distrito Kongresista Jonas Cortes.

“Tabangan unta kita sa Dios, diha sa atong mga katungdanan sa pagka-Kristyanos. Si San Jose patron sa Mandaue, patron sa tibuok simbahan, patron sa syudad sa Vaticano, ug patron sa mga security guard ni Pope Francis, kay iya man nabaton ang Sagrada pamilya sa Nazareth,”tipik sa wali ni Bishop Padilla.

Samtang gitug-an ni Police Colonel Julian Entoma, director sa Mandaue City Police Office, nga sukad sa pagsugod sa mga kalihukan sa niagi nga buwan alang ning tuiga nga kapistahan, hangtod sa Miyerkules sa hapon, wala ra silay mga natala nga dautan nga panghitabo nga naglambigit sa kapistahan.

Gawas sa mga pulis sa Centro Police Station, gipakatap usab ang Special Weapons and Tactics (SWAT) Explosive Ordnance Division (EOD) uban na ang K9 unit ilabi na sa mga kalingawan atol sa kagabhion. (FMD)