Kon moinom og alak, di magpalabi.

Kini maoy awhag sa mga awtoridad human ang usa ka lalaki nga taga Sityo Lub-ang, Barangay Casuntingan, dakbayan sa Mandaue, nahulog sa Butuanon River tungod sa kahubog hinungdan nga namatay.

Giila ang biktima nga si Ronnel J. Jumao-as, 23, kinsa napalgan nga naglutaw sa sapa duol sa Zone Ahos Pagatpan sa Paknaan mga alas 7 sa buntag sa Martes, Agusto 9, 2022.

Si Police Lt. Col. Franco Rudolf Oriol, deputy city director for operations ug tigpamaba sa Mandaue City Police Office (MCPO), niingon nga si Jumao-as gikatahong nawala niadtong Sabado, taho sa iyang pamilya niadtong Lunes, Agusto 8.

Matod ni Oriol nga matud pa sa iyang pamilya, ang katapusang higayon nga ilang nakit-an si Jumao-as dihang niingon ang naulahi nga makig-uban siya sa iyang mga higala aron mag-inom sa Sitio Orel, Barangay Banilad niadtong Sabado, Agusto 6.

Sukad niadto, wala na siya mopauli, pulong ni Oriol.

Kaniadtong Martes sa buntag, usa ka residente sa Zone Ahos ang nanawag sa kapulisan human nakit-an ang usa ka lalaki nga naglutaw sa sapa nga nagkulob duol sa iyang gipuy-an duol sa mga bakhaw.