MAASIN City--Usa ka high value target drug personality napatay sa anti illegal drug operation sa Maasin City, Southern Leyte.

Ang operasyon gipangunahan ni Police Lieutenant Wilfredo Camaso sa Southern Leyte Provincial Drug Enforcement Group uban sa Maasin Police, Provincial Intelligence Branch, Regional Intelligence Unit ug Philippine Drug Enforcement Agency.

Ang operasyon nahitabo sa Barangay Pasay, Maasin City, niadtong Hunyo 5, 2019.

Giila ang napatay nga suspek nga si Antonio Espera alyas Lansoy, taga Sitio Tubli, Barangay Tigbawan, Maasin City.Matod sa kapulisan, usa ka high value target level 2 ang suspek.

Matod sa report sa Police Regional Office (PRO) 8, usa ka poseur buyer ang positibong nakapalit sa suspek og lima ka pakete sa gituhoang shabu.

Sa dihang natunol na sa buyer ang marked money, nakabantay ang suspek nga pulis ang iyang ka transaksyon.

Nibunot kini og una sa iyang armas ug nisuway pagpamusil apan naunhan kini sa mga operatiba. Nakaangkon og mga samad pinusilan ang suspek ug dali gidala sa Southern Leyte Yniguez Memorial Provincial Hospital, apan gideklarar kini nga dead on arrival ni Dr. Wilfredo Tan. (JKDP)