KARON nga aduna’y bag-ong palisiya ang National Task Force Covid-19 alang sa pag-angkas sa motorsiklo, unsa ang angay nga mahibaw-an sa publiko?

Matod ni Land Transportation Franchising and Regulatory Board (LTFRB) 7 Regional Director Eduardo Montealto Jr., nga mamahimo na nga way barrier ang motorsiklo kon ang angkas niini anaa ra nagpuyo sa usa ka panimalay.

Kon ugaling makaagi og checkpoint, mamahimo ra nga ang identification (ID) card ipakita nga pareho ang address o kamatuoran nga minyo ang nagsakay.

Apan kon live-in lang kini ug di pareho ang address sa ID, kinahanglan nga mokuha og barangay certification nga nagpamatuod nga nagpuyo kini.

Mamahimo usab ang angkas bisan og wa nagpuyo sa usa ka panimalay, apan gikinahanglan na ang barrier niini.

Matod ni Montealto nga kinahanglan nga Authorized Persons Outside of Residence (APOR) ang angkas apan di ra kinahanglan nga Apor ang driver.

Giklaro nuon niini nga di mamahimo ang bisan unsa nga motorcycle ride-hailing app o habal-habal tungod kay wa pa aprobahe. Kinahanglan ang driver di for hire.

Gawas sa naandan nga face mask, kinahanglan usab ang full face helmet alang sa parehong pasahero ug driver.

Ang Land Transportation Office (LTO) 7, sa ilang bahin, suportado ang maong kalambuan.

“We welcome the development and we continue to support the intention of ensuring people are always safe even if they are outside,” si LTO 7 Regional Director Victor Emmanuel Caindec sa pamahayag niini.

Dugang ni Caindec nga sila sa ahensiya niila na sa motorsiklo bisan kaniadto pa nga usa kini ka “essential part of transportation modality especially during now that public transport is limited.”

“We continue to encourage people to be mindful of their safety in wearing face shields and masks for public transport and face masks for private vehicles. Finally, we will continue to our mandate in ensuring roadworthiness for the safety of everyone,” dugang ni Caindec. (HBL)