HUMAN nakigtagbo si Royina Garma, general manager sa Philippine Charity Sweepstakes Office (PCSO), kang Police Brigadier General Ronnie Montejo, direktor sa Police Regional Office (PRO) 7, gilusad dayon ang subsob nga operasyon batok sa ilegal nga small town lottery (STL) sa Central Visayas.

Matod ni Montejo, sukad siya milingkod isip hepe sa PRO 7, walay lugak ang ilang kampanya sa bisan unsa nga matang sa ilegal nga sugal sama sa ilegal swertres, hantak ug tigbakay.

Si Garma una nang nanawagan sa kapulisan nga mohimog clearing operations batok sa illegal nga sugal sama sa STL sa siyudad sa Sugbo ug dakbayan sa Mandaue sanglit wala pa sila mohatag og permit sa maong mga dapit.

“Tuloytuloy lang ang atong campaign against all forms of illegal activities, sa illegal gambling apil na pud sa illegal drugs padayon ta,” matod ni Montejo.

Bahad niya sa operators sa ilegal nga sugal nga kon magpadayon sila sa ilang kalihukan, gukdon gyud nila kini.

Dugang niya nga wala lang makatutok ang kapulisan sa siyudad sa Sugbo ug dakbayan sa Mandaue nga unang gibutyag ni Garma nga usa sa labing daghan nga illegal STL operators lakip na sa ubang lugar sa Central Visayas.

Bisan pa man nga adunay legal nga nagpadagan sa probinsya sa Sugbo, apan duna gihapoy mabantayan nga illegal swertres operations.

Gimandoan na ni Montejo ang tanang station commanders nga ilang subayon kining mga nagmontar og booth diha daplin sa karsada nga susihon kon kini legal ba o ilegal aron madakpan kini.

Si Garma sa iyang bahin, niingon ang mga illegal STL nga nag-operate dinhi sa Metro Cebu, migamit sa resulta sa swertres nga hugot nga gidili sanglit aduna silay kaugalingon nga resulta.

Nakigtagbo na si Garma sa mga mayor sa probinsya ug Metro Cebu apan iya kining usbon ngadto na sa ilang mga opisina kay alang niya dili mahimo sa mga police ang kadaghan sa mga yellow booth nga naa na sa sidewalk.

“Wala yan, supposed to be hindi sila nag-exist, kailangan i-clearing yung iba nga dyan nasa estero na obstruction na nga eh, makipag-usap ako. Maybe, I will schedule sa LGUs din to talk to them, kasi hindi lang kaya ng police to, we need the support of the LGU also for the clearing,” matod ni Garma.

Aduna matod pay umaabot nga operation sa STL sa siyudad sa Mandaue nga gihatagan og permit sa PCSO nga maoy hinungdan nga sa wala pa kini magsugod, wala na ang mga illegal.

Giangkon ni Garma nga tungod niining pagkatap sa illegal nga sugal apektado ang ilang koleksyon ug daghan ang maapektohan sama sa ilang charity works ug ayuda sa lokal nga kahamhanan. (AYB)