SAMA sa salida sa sine ang ginukdanay tali sa kapulisan ug sa usa ka lalake nga job order nga kawani nga nagsakay sa motorsiklo samtang nagdala og pistola ug granada sa alas 5:30 sa hapon, Hulyo 13, 2020, sa Barangay Japitan, lungsod sa Barili.

Ang suspek giilang si Earl Jade Villarin, 32, dunay kapuyo, taga Brgy. Malolos, Barili, JO sa information office sa munisipyo sa Barili.

Si Villarin nakuhaan og usa ka paltik nga kalibre .45 nga pistola nga dunay lima ka mga bala sud sa magazine ug usa ka granada.

Si Police Staff Sgt. Jeffrey Alpas sa Barili Police Station nga nahinabi sa Superbalita Cebu nagkanayon nga dunay nitawag sa ilang buhatan nga dunay lalake nga armado nga nagminihog motorsiklo nga gikaaway sa laing nagmotorsiklo.

Wa maglangay ang kapulisan sa Barili, ilang gipangita ang lalake nga nagsakay sa motorsiklo nga nag t-shirt og puti nga dunay stripe ug nagkawog puti ug nakamaong og karsones.

Atol sa ginukdanay, naabtan sa kapulisan si Villarin sa Brgy. Japitan, nakugang dihang gibabagan siya og kalit sa kapulisan. (GPL)