PATAY dihadiha kining usa ka kanhi piniriso human pusila sa nagbinugtong nga tawo niadtong Miyerkules, Agusto 5, sayo sa kagabion sa Happy Valley sa Barangay Bulacao, siyudad sa Sugbo.

Si PSsgt. Benjie Maglajos sa Pardo Police Station niila sa biktima nga si Jomar Palco, 30, ug lumad nga taga dakbayan sa Maasin City, Leyte.

Matud ni Maglajos, ang biktima nailhan kini subay sa pag-ila sa iyang kapuyo nga si Grezel Marindoque, 19, molupyo sa Sityo Kabangkalan sa maong barangay.

Sa imbestigasyon sa kapulisan nasayran nga ang biktima kanhi na priso sulod sa lima ka tuig ug bag-o lang naka gawas.

Ang biktima gipusil-patay samtang naglakaw sa sudlunon nga dan sa Bulacao sa suspek nga nag lakaw ra usab nga nag binugtong nga mi pusil sa biktima.

Naigo si Palco sa iyang wala nga dughan ug ulo.

Ang mamumuno nigamit sa pagpamusil gituohan nga kalibre sa 45.

Sumala sa Pardo Police, ang motibo sa pagpatay posibleng panimalos.

Si Marindoque, nahinabi sa Superbalita Cebu, niingon nga wala siya nahibalo nga dunay kaaway sa iyang kapuyo gawas lang sa nabasahan sa messenger sa

Facebook account niini nga mibahad kang Palco. (BBT)