TACLOBAN City--Sangang buhatan sa duha ka giingong investment scheme ang gisunod sa pagronda sa managlahing law enforcement units niadtong Lunes, Hunyo 10, 2019.

Ang mga establisemento mao ang Kapa Community Ministry International nga nahimutang sa Barangay Marasbaras ug ang buhatan sa Organico Agribusiness Ventures Corp. sa Barangay 110, UTAP nga pulos nahimutang sa Tacloban City.

Unang gironda ang Kapa sa mga sakop sa National Bureau of Investigation (NBI) 8 nga gipangulohan ni Special Investigator Jess Cadaingan ug Police Major Jesus Esoy sa Tacloban Police Station 1, bitbit ang search warrant nga giluwatan ni Judge Marivic Balisi Upmali, 1st Vice Executive Judge sa RTC National Capital Region.

Samtang ang tropa ni Police Lieutenant Niel Edward Retana sa Regional Mobile Force Battalion ang nagsilbing crowd control samtang gipahigayon ang pagsiksik sa maong establisemento.

Kini ilabi na nga ubay-ubay sa mga Kapa members ang nag-atang sa gawas.

Usa sa mga miyembro kinsa nagdumili sa pagpahingilan ang mikomento nga wala silay problema sa Kapa ug mikwestyon kon ngano ang Kapa lang ang gi-initan ug wala ang uban.

Atol niining pagsuwat wa pay report nga nasikop ang awtoridad atol sa ronda sa dihang nagabin-an ang operasyon.

Sa susamang kalambuan, gironda sab sa Securities and Exchange Commission (SEC) ug Criminal Investigation and Detection Group (CIDG) 8 ang Organico Tacloban branch.

Sila si Sherwin Guzon sa SEC 8 ug CIDG Regional Director Romuald Padilla ang nangulo sa linaing operasyon nga nagbitbit og search warrant.

Way naabtan ang awtoridad sa buhatan sa Organico ug misugat nalang nila ang nakapaskin sa gawas nga bahin ang pahibawo nga “closed for renovation”.

Giklaro sa warrant nga nakalapas ang Organico sa Section 73 sa Republic Act 8799 o ang Securities Regulation Code.

Way bisan usa ka representante sa duha ka investment scheme ang mipatim-aw aron sa paghatag og pagpasabot.