Gibasura sa Regional Trial Court Branch 14 sa 7th Judicial Region ang gipangayong writ of preliminary injunction sa kanhi mga sakop sa Board of Directors (BOD) sa Metro Cebu Water District (MCWD) nga gitangtang sa Local Water Utilities Administration (LWUA) ubos sa rekomendasyon sa Cebu City Government niadtong tuog 2019.

Ang maong kaso gisang-at sa kampo nilang Atty. Ralph Sevilla, Augustus Pe Jr. ug Atty. Cecilia Adlawan batok ngadto nilang Mayor Edgardo Labella, LWUA Administrator Jeci Lapus ug kaubanan aron sila mabalik sa pwesto apan way nakita nga lig-ong basehan ug ideklarar nga illegal ang ilang pagkatangtang.

Kini base sa hukom ni Presiding Judge Merlo Bagano sa iyang decision niadtong Hunyo 30, 2021.

“The law grants LWUA the power to review both legal and illegal terminations. And in the case of an illegal termination, LWUA has the inherent Authority to disapprove the same. This was not availed of by plaintiffs as indicated by their failure to submit a content on their termination when required to do so by LWUA,” tipik sa resolution ni Bagano.

“All in all, this court sees no legal and factual basis for the issuance a writ of preliminary injunction, accordingly, denies the same,” dugang sa hukom ni Bagano.

Ang desisyon sa korte gihangop sa Cebu City Hall pinaagi sa ilang abogado nga si Rey Gealon.

Gumikan niini, wala nay babag ang paglingkod nilang Atty. Jose Daluz III isip chairman, Atty. Frank Malilong, Atty. Manollette Fel Dinsay , Engr. Miguelito Pato, Mae Seno isip mga sakop sa BOD.

Giresulba sa korte ang reklamo sa plaintiffs gumikan sa pagtangtang ni Labella sa mga sakop sa MCWD BOD sanglit ilang gihulagway nga way gahom ang mayor pag-terminate sa BOD ug wala sila hatagi og due process ug nangangkon nga anaa ang tanang rekisito sa injunction. (PAC)