MGA katawa, pasiaw, mga hulagway ug mga kasinatian ang magsilbi nga mga handumanan sa mga tawo nga nag-okupar sa Patria de Cebu sud sa pipila ka mga tuig sa higayon nga gub-on na kini sa Enero sa sunod tuig.

Atol sa ilang katapusang hiniusang Christmas party sa Lunes, Disyembre 17, si Cebu Archbishop Jose Palma nidasig sa mga tawo nga nanarbaho o nag-ukopar sa Patria de Cebu nga ipabilin ang maong mga kasinatian sa Patria sa ilang panumdoman isip kabahin sa ilang pagpanaw sa ilang pagka Sugbuanon ug Katoliko.

“Kay mao naman kini ang katapusan nga Christmas nga makita pa ang Patria. So, whatever you may have nga pwede nato mapikturan, pwede nato ma-record as part of our life and part of the memories that we treasure. But above all because life is a journey,” padayag ni Palma nga nitambong sa Christmas party nga gipahigayon sa Cathedral Museum of Cebu.

Si Sister Maridel Gonzaga, 29, formation incharge sa Cebu Archdiocesan Program for Self-Reliance (CAPS-R), Inc., nipaambit nga makasaysayanon ang Patria de Cebu kay nahimo kining parte sa iyang bokasyon diin sa maong building nagsugod ang iyang unang assignment isip religious sister niadtong Disyembre 12, 2014 isip sakop sa Living the Gospel Community.

“Siyempre maguol ta no, mingawon ta mawala na pero wa ta kabalo, basin naa man sila maayo nga mga plano nga buhaton diha,” pahayag ni Gonzaga.

Ang Patria usab ang nahimong saksi sa mga gimbuhaton ni Rudy Cabaluna isip layout artist sa “Ang Lungsoranon,” ang opisyal nga publication sa artsidyosesis sa Sugbo sud sa 18 ka tuig.

Sa iyang pakigpulong sa party, si Cebu Auxiliary Bishop Oscar Jaime Florencio namahayag nga bisan og magkalagyo na ang mga empleyado sa lainlaing mga buhatan nga kanhi nag-ukopar sa Patria, magpabilin gihapon sila nga pamilya.

Karong adlawa, Disyembre 18, magtagbo si Palma ug mga sakop sa Archdiocesan Committee on Cultural Heritage nga pangulohan ni Architect Melva Java sa Archbishop’s Palace labot sa pagguba na sa Patria.

Matod sa arsobispo estoryahan sa tigom kon duna bay parte sa Patria ang pwede magpabilin sa higayon nga magsugod na ang Cebu Landmasters Inc. sa pagpalambo sa dapit uban sa bag-ong mga estruktura. (SCG)