Patay nang niabot sa ospital ang usa ka kawani sa Lapu-Lapu City Hall nga gipusil sa wa pa mailhing mamumuno pasado alas 3 sa hapon sa Martes, Pebrero 23, 2021 sa may parking lot sa city hall.

Ang biktima giilang si Abdullah Pabilla, kasamtangang nagtrabaho isip special agent sa Mayor’s Office sa kagamhanan, sumala ni Police Colonel Arnel Banzon, director sa Lapu-Lapu City Police Office (LCPO).

Matod ni Banzon nga si Pabilla nangape lang unta sa usa ka tindahan duol sa parking lot sa City hall dihang kalit nga miabot ang duha ka wa mailhing lalake ug dayong pusil kaniya.

Dali usab nga misibat ang mga mamumuno agi sa luyo sa city hall luwan sa motorsiklo.

Nagpasad sa crime scene ang mga basiyo sa wala pa matinong kalibre sa armas de fuego.

Labing minos unom ka mga kabhang sa bala ang nakaplagan sa kapulisan.

Iyang kaubang mga Muslim ra usab ang niladala kang Pabela sa tambalanan.

“Wala pa nato ma establish og unsa gyud ni. Naa ba ni siya kontra. Ang atong hepe sa Station 5 (LCPO) padayon pa karon sa pag follow-up ug estorya sa mga pamilya aning biktima og duna ba ni siya gikaaway,” matod ni Banzon sa Superbalita Cebu.