Nasikop sa kapulisan ang usa ka kawani sa usa ka state university sa Tacloban City gumikan sa pagbaligya og gituhoang shabu.

Ang operasyon gilusad alas 9:40 sa buntag sa Sabado, Oktubre 16, 2021 sa Saint Francis Village, Brgy. 105 San Isidro, Tacloban City.

Ang suspek giila nga si Charlie Engracial, 45, minyo, kawani sa Eastern Visayas State University (EVSU).

Matod sa kapulisan, nalakip sa ilang listahan isip high value target si Engracial.

Gipaubos siya sa surveillance kahuman nakadawat og daghang report bahin sa ilegal nga binuhatan.

Atol sa operasyon, usa ka poseur buyer ang nakigtransaksyon kang Engracial ug napalitan siya og usa ka pakete sa gituhoang shabu.

Gipalibutan siya sa mga pulis ug gideklara ang pagsikop kaniya.

Atubangan sa mga saksi, gikapkapan si Engraciak ug nakuhaan pa og laing tulo ka pakete sa gituhoang shabu, lakip ang marked money.

Ang nakuha nga ilegal nga drugas mitimbang og 1 gramo ug dunay kantidad nga P10,000.

Ang suspek naa sa kustodiya sa kapulisan ug gipasakaan na og kasong kalapasan sa Republic Act 9165 kun Comprehensive Dangerous Drugs Act of 2002./ JKDP