ORMOC CITY - Balik na sa normal ang biyahe sa mga barko ug klase sa mga tunghaan nga apektado sa bagyong Samuel sa Eastern Visayas.

Alas 11:00 kagahapon, gilibkas na sa Philippine Atmospheric Geophysical and Astronomical Services Administration (Pagasa) ang storm signal sa Eastern Visayas.

Niana, ang Philippine Coast Guard-Eastern Visayas, nihatag na og permiso sa tanang shipping companies sa pagpabiyahe sa mga barko ug fastcraft.

“Pag wala na pong storm signal ang isang lugar ay pwede na pong mag resume ng kanilang biyahe ang mga sea vessels. Advice po ng Pagasa yung sinusunod natin,” matod ni PCG-Eastern Visayas spokesperson Lawrence Roue.

Taas nga pila ang nasinati sa mga ticketing offices gumikan sa mga nagpa-re-schedule sa ilang biyahe.

Resulta niini, puno sa mga pasahero ang mga fastcraft ug dagkong barko. Ang mga lokal nga kagamhanan nga nagdeklara og class suspension, milibkas na usab sa ilang deklarasyon ug duna nay klase karong adlawa.

Gisusi pa usab sa Agriculture ug Engineering offices sa mga apektadong lugar ang kadaot nga namugna ni ‘Samuel.’

Pipila ka lugar sa Samar area ang nakasinati og pagdahili sa yuta apan dali kini nga gilimpyohan sa Departmet of Public Works and Highways (DPWH).

Gikatakda na usab nga mobalik sa ilang mga pinuy-anan ang mga pamilya nga mibakwit sa mga evacuation center.

Gihulagway sa kapulisan sa Ormoc nga malinawon ug walay dagkong krimen nga nahitabo atol sa pag-igo sa bagyo.

Matod sa lokal nga kagamhanan sa Ormoc, bisan og menos ang epekto sa dakbayan ang bagyo apan mas maayo nga mangandam ug seguruhon nga way kinabuhing makalas. JKDP