ORMOC CITY -- Duna nay biyahe ang mga sea vessels ug padayon na ang klase sa mga tunghaan sa Eastern Visayas.

Mipahibawo ang Philippine Coast Guard (PCG) sa Eastern Visayas nga pwede na makabiyahe ang mga sea vessels paingon sa Cebu o bisan asang lugar.

Kini human gilibkas sa Philippine Atmospheric, Geophysical and Astronomical Services Administration (Pagasa) ang storm signals sa Eastern Samar, Samar, Leyte, Southern Leyte, ug Biliran.

Matod sa PCG-Eastern Visayas, dunay kapin 400 ka pasahero ang stranded sa mga pier sa Leyte.

Naglakip kini sa Isabel, Bato, Hilongos, Ormoc City, Baybay, ug Palompon.

Dugang sa PCG, alas 9 karong gabie, Lunes, wala pay barko sa Ormoc City nga mo biyahe paingon sa Cebu gumikan kay nag take shelter pa kini.

Base sa report sa Police Regional Office-Eastern Visayas, alas 3 ganihang hapon dunay 1,115 ka pasahero, 244 ka sakyanan, ug 9 ka sea vessels ang stranded lukop rehiyon.

Walay natala nga dakong kadaut ang bagyong Amang sa Eastern Visayas.

Duna na usab klase ang mga tunghaan sa Eastern Visayas ugmang adlawa, Enero 22.

Base sa final bulletin sa Pagasa, alas 7 karong gabie, Enero 21, nahimo na lang nga low pressure area ang bagyong Amang ug naa kini 85 kilometros east sa Catarman, Northern Samar. (JKDP/Superbalita Cebu)