PROTEKTOR sa kolurom nga mga pasaheruan giingon nga anaa sa City of Talisay Traffic and Development Authority (CT-TODA), traffic enforcers sa ubang syudad ug lungsod ingon man sa usa ka national agency.

Hinungdan nga ang pangulo sa (CT-TODA), Jonathan Tumulak, nanawagan sa mga tawo nga adunay kasayuran ug insakto nga ebidensya nga mopatim-aw sa iyang buhatan.

Kon adunay mga sakop sa CT-TODA nga nalambigit, matud ni Tumulak, di magpanuko ang kagamhanan nga motaktak sa serbisyo.

Si Tumulak nitug-an nga sa miaging semana, usa sa mga drayber sa kolurom nga pasaheruan sa Siyudad sa Talisay niangkon kaniya nga mao nga dili sila maundang kay anaa silay kontak gikan sa CT-TODA ug ubang mga ahensya sa gobyerno.

‘Dunay mga driver mismo sa kolurom nga maoy ni-open, nga maoy hinungdan nga isog kuno kaayo sila kay adunay silay proteksyon nga gikan sa CT-TODA, gikan sa Cebu City, gikan sa national agency. Maoy hinungdan nga dili kuno sila madakpan sa LTFRB, kay dunay kunoy tig-timbre kanila,” saysay ni Tumulak sa mga tigbalita.

Daan na nga gipahimangnoan ang mga operator sa mao nga mga sakyanan nga magbiyahian sa South Road Properties (SRP) paingon sa Syudad sa Sugbo ug vice versa, nga sila sikopon na. Kini human nga niabot na sa uluhang buhatan sa nasud ang reklamo.

Gikan pa sa Department of Interior ang Local Government (DILG) ang suwat ngadto kang Mayor Gerald Anthony Gullas sa Talisay City nga sulbaron sa madali nga panahon ang reklamo, kalabot sa mga kolurom.

Si Gullas nitabang na kanila pinaagi sa pagtuman sa ilang hangyo nga makahinabi ang direktor sa Land Transportation Franchising and Regulatory Board (LTFRB-7).

Mismo si LTFRB-7 Director Eduardo Montealto nitambag kanila nga magpasakop o moumol og kooperatiba aron makakuha og prangkisa alang sa rota diha sa SRP.

Apan gipahimangnuan ang mga operator nga samtang wala pa ang pangkisa, di sila tugutan nga mamasahero, hinungdan nga dakpon sila, ug mamahimong magbayad kon pila ang kantidad sa ilang sakyanan nga masakmit.

Apan aduna gihapoy nadawat nga impormasyon ang CT-TODA nga hangtud karon nagpadayon ang ilegal nga pagpamasahero.

Si Tumulak nibutyag nga gipaabot na usab niya kini ngadto Montealto ug nisusi niini.

“Sa among pagkahibaw, so amo dayon gi-alerto atong mga kauban, ug gipahimangnuan, nga once makadawat nako og pangalan ug kinsa ning tawhana, naa lang koy igong ebidensya ato gyud taktakon, (ang sakop sa CT-TODA nga protector,” dugang ni Tumulak.