SA IKA-TULO ka tuig subli nga gihimo ang pag-award sa mga kompanya o business establishment nga maayo mudala sa ilahang mga kawani sa dakbayan sa Mandaue.

Gilusad, Biyernes sa buntag, Abril 26, ang Search for 2019 Gawad Linaw Award, programa nga gihimo sa kagamhanan sa maong dakbayan, pinaagi sa ilahang Tripartite Industrial Peace Council (TIPC).

Ang maong programa ang labing una ug nag-inusara pa sa tibuok Central Visayas.

Diin karong Labor Day sa Mayo 1, ang sugod alang sa pagdawat sa mga nominasyon alang sa kategorya sa small, medium ug large enterprise, lakip na sa unionized ug un-unionized firm.

Tinabangan kini sa Mandaue Chamber of Commerce and Industry nga gipanguluhan ni Girlie Garces, ug National Conciliation and Mediation Board.

Dakung tinguha sa programa nga kon maayo ug malinawon ang pagtrabaho sa mga mamumuo sa ilang kompanya, mas makab-ot ang progresibo ug malambuon nga kompanya ug produkto, lakip na ang tibuok komunidad.

“In this way we are promoting industrial peace in all of our business establishments in the city. If we are also after for the welfare of the workers, we will be successful in our goals and be more progressive,” asoy ni bise mayor Carlo Fortuna, kinsa nangulo sa paglusad.

Atol sa launching anaa ang bag-o nga regional director sa Department of Labor and Employment (Dole)- Central Visayas nga si Salome Siaton, kinsa nipadayag sa iyang paghangop sa initiative sa kagamhanan sa Mandaue ug sa TICP, pagmugna sa maong proyekto.

Nanghinaot si Siaton nga mahimo kini sa ubang lokal nga kagamhanan.

Si Edmundo Mirasol ang director sa National Conciliation and Mediation Board, ang nibutyag sa mga gikinahangalan aron mahimo nga mosalmot, sama nalang nga kinahanglan diha gyud ang negusyo sa dakbayan sa Mandaue sulod na sa lima ka tuig pataas, diin anaa kini minimum og 20 ka mga kawani.

Alang sa dugang pa nga kasayuran mahimo nga muduol ang buhatan sa TIPC sa Mandaue City hall o sa vice mayor's office.

Ang screening sa mga nominees himuon sa Septiyembre 6, ang pagpili sa mananaug sa Septiyembre 20 ug ang awarding sa Nobiyembre 15.

Awhag usab ni Dole- Central Visayas director nga mas maayo unta og madugangan og category alang sa best worker.