NALANDIG sa tambalanan sa siyudad sa Sugbo ang usa ka konsehal sa Barangay Togonon, siyudad sa Danao human mabunal ang ulo sa bato atol sa ilang panag-away sa usa ka habal-habal driver niadtong Dominggo, Agusto 11, sa alas 10:30 sa buntag.

Nahitabo ang insidente sa dihang nag-abot ang duha sa Sitio Camanse, Barangay Togonon.

Matod ni Police Captain Roberto Hugo, deputy chief sa Danao City police station, nga silang konsehal Elvi Lauron Capin, 44, ug Jovy Medio Barbero, 30, usa ka habal-habal driver, pulos hubog nga nag-abot sa usa ka lugar.

Giingong nagbalik karaan nga kasungian sa duha sa dihang nanga hubog na nga miresulta sa ilang panag-away.

Mikuha og sundang si Capin, samtang si Barbero mikuha usab og kahoy.

Gitigbas sa konsehal ang habal-habal driver apan nasagang kini nga maoy hinungdan nga nasamad ang bukton niini.

Apan nakahigayon sa pag-sukmag ang habal-habal driver nga si Barbero nga mi-knock down ni konsehal nga miigo ang ulo sa bato.

Dali nga gidala si Capin sa usa ka pribadong tambalanan sa siyudad sa Sugbo, samtang si Barbero kasamtangan nga gitanggong sa police station.

“Karaan na man daw ni ilang away, nya nag-abot sila nga pulos hubog didto na nagsugod ilang engkwentro, pero na grabehan si konsehal kay na tumba man ni unya na bunal ang ulo sa bato, mao to nga naay samad sa ulo,” matod ni Hugo.

Adunay wala pagsinabtanay ang duha matod ni Hugo, gani ang asawa sa habalhabal driver pag-umangkon ra usab ni Capin. (Superbalita Cebu)